Zimbabwe President Robert Mugabe don resign, according to the parliament speaker Jacob Mudenda.
The 93-years-old man don resign as dem start the impeachment process on Tuesday.
Mr. Mudenda don announce sey Mr. Mugabe send letter to parliament sey im don resign as president, this mek dem stop the impeachment process.
Mr. Mugabe don dey rule the southern African nation since 1980, dem be want mek e announce sey im resign on Sunday after e party ZANU-PF remove am as leader. The party give am 24 hours to resign as president or dem go impeach am comot.
Last week, Zimbabwe military put Mr. Mugabe for house arrest and tell am mek e sofri resign.
The military take power because Mr. Mugabe sack the vice president Emmerson Mnangagwa and dem see sey im want mek e wife the vice president, Grace Mugabe.
Military drive their tank enter Zimbabwe capital city Harare on Nov. 14 2017 and dem announce sey dem don put Mr. Mugabe for house arrest.
Mr. Mugabe don dey rule since Zimbabwe get independence 1980.