New Year prophecy wey pastors dey share with millions of dia followers na important thing for some Nigeria Christians.
Plenty Nigerian Christians believe dia pastors dey see vision wey God dey show dem on top wetin go happen for future. E dey give some people direction and others hope.
Already, one popular Nigeria pastor, Daniel Olukoya of Mountain of Fire and Miracles, don talk say 2018 na year of 'political confusion' for Nigeria.
But the question be say, Nigerians dey believe this prophecy say dem dey happen true-true?
Make we rewind go back New Year 2017, chook eye see wetin one or two pastor dem talk for the beginning of the year, come see wetin happen for the end of dat year.
2017 go be year of surprise
Na 'surprise' full the 9-point vision Pastor Enoch Adeboye, senior pastor for the Redeemed Christian Church of God, share with millions of church people for im New Year prophecy for 2017.
''Many governments all over the world go dey surprise'', na wetin Pastor Adeboye talk.
USA, Zimbabwe, Angola, Kenya, Democratic Republic of Congo, France, Germany, Austria, Republic of Ireland, Pakistan, China and even Nigeria na some of the many countries wey surprise meet their government dem enter December self.
Some world leaders lose their power like Robert Mugabe for Zimbabwe after 37 years, others win power no one believe say fit happen, like 40 year-old France President Emmanuel Macron.
This na proof why civil servant Ada Onyeka for Onitsha, south-east Nigeria talk say she dey believe men of God when dem talk their prophecy for the new year.
''I be strong believer of prophecy especially when na from pastors like Pastor Adeboye and Bishop David Oyedepo of Living Faith Church Worldwide International'' Onyeka talk.
''Their own prophecy dey happen''.
Wayo people go cry for Nigeria
Dr. Daniel Olukoya of Mountain of Fire and Miracles talk say people wey dey chop money go jam plenty headache, for im 2017 New Year prophecy.
No be lie say, anti-corruption agency for Nigeria, the Economic and Financial Crimes Commission don busy for 2017 as dem dey fight corruption, but plenty people don talk say as EFCC dey fight corruption, na so corruption dey fight back.
''No be every time pastor go talk prophecy and e must to happen the year wey dem talk am, sometimes e fit tey before the thing happen.'' Na wetin journalist, Bolanle Babalola for Abuja FCT talk.
Pastors no dey too dey direct with their prophecy
But movie writer Bode Asiyanbi for Benin, south-south Nigeria dey see things with different eye.
''For olden days, men of God wey dey see vision go talk things like, 'one great man go come from the tribe of Judah free the slaves of Egypt', and you get idea who this person go be later.'' Asiyanbi talk.
''No be like pastors for today wey their vision no dey get head or tail.''
Asiyanbi believe say anybody wey dey follow tori people dem, dey watch wetin dey happen for world for TV or radio fit get idea wetin go happen for future.
''Take for example di wahala of hurricane wey dey cause strong wind and flooding, dey scatter people house and business. Because climate change dey worry this our world, l know need any pastor to tell me say hurricane go happen every year''.
Asiyanbi still talk say, ''No be like say prophesy no dey happen o, but l go like if our pastor dem dey talk direct prophecy, prophecy wey declare A to Z, no be the corner corner one wey we no too sure who or what dem dey talk about''.
Last last, Babalola talk say she believe some pastors dey see vision, but for others na wetin dey their mind dem dey talk.