United States don draw ear give the Democratic Republic of Congo on Monday say make dem no use electronic voting system for their December this year because mago-mago fit enter am.
US Ambassador to the United Nations Nikki Haley be dey talk for one informal U.N. Security Council meeting about the Congolese presidential election wey don see many delays, say: "to use technology wey people no sabi for the first time inside important election na very big risk."
"This election must happen by paper ballots so that Congo pipo no go get fear about the result. The U.S. no get desire to support electronic voting system," Haley be talk for the meeting US organise.
Several other countries wey dey the 15-member council also talk say dem no want make Congo use the new system.
Election to replace President Joseph Kabila, wey don dey power since dem kill im papa for office in 2011, go happen by December 2018, if the government no change am again.
Congolese government delay the elections many times before and this one don cause tension across the country, with many serious I-no-gree protests wey people don carry enter streets, even as Kabila don refuse to step down since 2016 when im term expire.
Corneille Nangaa, President of the Independent National Electoral Commission, tell the informal Security Council meeting say dem wan use the new voting machines because "the money and the weight of all the equipment go reduce from 16,000 tons to less than 8,000 tons."
But di Central African director for Human Rights Watch Ida Sawyer talk say the new electronic voting machines "go create new opportunities for fraud."
"Without voting machines, elections on 23 December 2018, no go happen" talk Nangaa as im stand im ground on top the mata.
Kabila ruling majority and opposition leaders be do deal to allow the president stay for power on top say election must hold by end of 2017. But the country electoral commission, later say e no go dey possible again, and dem come move am to December 2018.