Remember when you dey wish for 2017, mek you use am do better with your life? Well, that no be yesterday because the end of the year don land.
So, mek we look some of the good and bad things wey happen this year.
Good moments for 2017
Wizkid Performance for London
If you wan look for one person wey win for 2017, na Wizkid.
For September, im shut down the Royal Albert Hall for London, UK even after im start the performance two hours late.
Also, im break record as im become the first African to collect award as best international act for the Music Of Black Origin (MOBO), where im flog people like Jay-Z.
Bastie v. Banku
Bukom Banku chop im first losing for im career this year but e sweet the mind of plenty people, because im bin dey boast sey e be "Ghana Mayweather".
Na for round 7 na im Bastie Samir beat am to stop im unbroken run.
The World Cup Qualification
As 2018 na year of the Russia World Cup, this one mek this year qualification season.
Nigeria qualify for the 2018 World Cup like film but for inside the qualification, dem don start to yab Ghana wey no qualify.
Cameroon carry the 2017 AFCON Cup
For February, Cameroon win the African Cup of Nations for the first time in fifteen years.
This one sweet dem belle sotey President Paul Biya take congratulations baff dem for Unity Palace.
Free SHS education for Ghana
This year President Akufo-Addo release new policy sey dem go dey fund the secondary high school (SHS) education.
This one mean sey to get senior education no go cost money again, although now e still dey pilot stage wey mean sey dem just wan start.
Bad moments for 2017
Slave Trade for Libya
One of the biggest tori for this year wey hit people for head like stone na when the tori come out sey dem dey auction sell people for Libya.
This one don mek the Nigerian and Ghanaian government start to dey put head together, dey arrange, so dar dem country people fit come back house.
Floods wey full everywhere
Water become major problem for people for world this year. Mostly, for Sierra Leone, where mudslide bin carry pass 400 people to their death near Freetown.
People for their begin dey vex, dey blame government sey na because dem bin no get better urban planning. Even for Nigeria for Benue state, flood drive more than 100,000 people comot house.
Secession plan wey no work
For Nigeria and Cameroon, October 2017 na time wey many of dem no go quick forget. This Biafra bin get plan to comot from Nigeria and Ambazonia bin get plan to comot from Cameroon.
As at now, thousands of refugees don run comot from Cameroon enter Nigeria sake of sey dem dey run for their life,
For Nigeria, dem still dey find Nnamdi Kanu, wey be one of the people wey bin dey push for Biafra.
Rochas Okorocha and im statues
Rochas Okorocha this year do plenty things wey mek people begin dey scratch head. First na when im start to dey comot wrapper from statues wey im do for African leaders for Imo state, Nigeria.
Another one na when im name im sister as Commissioner of Happiness, e no really work because around that period people bin start to vex on top sey dem no see salary collect.
Alex Ekwueme die
Na this year, the first vice president wey Nigeria ever get, Alex Ekueme die. E pain people well well.
E bin go London because im get chest infection and na for there im die.