President Muhammadu Buhari don share im 2017 Christmas message to Nigerians, e sey; “I dey convince sey better days dey for our front as nation and as we dey mek progress for all the major things wey we wan put our energy for so that we go fit overcome challenges”.
Read the full message;
I greet all Nigerians, especially our Christian brothers and sisters, for this year Christmas day celebration.
The celebration of Jesus Christ birthday dey important and na opportunity for us to show love to people and encourage unity na to spend better time with our friends, families and the less-privileged.
Na still time for us to get inspiration from the lifestyle and teaching of Jesus Christ, wey dey stand for the thing wey dey right, true and honest.
The Holy Book describe Christmas as time for peace, joy, healing, hope and fulfilment. E put big expectation for heart, even if we dey face challenges now.
As we dey celebrate this Yuletide season, mek we use some time take pray and appreciate the sacrifices wey our armed services don do to keep our nation safe and secure.
For the same time, and as we dey keep with the spirit of the season, our gallant troops dey serve for front dey fight against insurgency; those people wey wound, wey dey for hospital, and all the civilians wey don suffer from the things wey this evil and wicked elements dey do for this past years, dey deserve our goodwill and prayers.
The things wey this people don pass through go continue to inspire us to get victory as we fight the enemy and arrest those people wey dey work against the unity of our nation.
For this season of hope, mek we remember to help people wey no get to do this Christmas, or people wey dem no get house or wey dem drive comot from their house by insurgency or violence, especially the Internally Displaced Persons.
Lately, we don see increase of trans-border matter wey mek our youths go do modern slavery through irregular migration. We don mek our efforts to stop this wicked thing against our mobile generation, and we don bring some of our people wey no get where to go for abroad come back, we beg dem mek dey no take this journey again.
I dey convince sey better days dey for our front as nation and as we dey mek progress for all the major things wey we wan put our energy for so that we go fit overcome challenges.
I wish everybody Happy Christmas celebrations.