E don pass 28,000 refugees from southern Cameroon wey don pack enter Nigeria as at January 2018.
The number na wetin groups wey dey range the refugee dem with United Nations Refugee Agency (UNHCR) and Nigerian Immigration talk.
The tori be say the refugee dem begin pack run comot from 16 boundary community for Cameroon wey dey near Nigeria from 1 October 2017.
That na the time wey one group for southern Cameroon bin declare say dem wan break away form their own country, wey dem call Ambazonia, because of the Anglophone palava.
Matter worse pass for December 2017 when killing begin happen for Mamfe for southern Cameroon sotey the villagers begin run comot from the country.
One person from Southern Cameroon Volunteers wey dey help refugees move inside Nigeria, talk say the refugee dem dey for Cross River, Akwa Ibom, Benue and Taraba states. While others dey Lagos, Abuja, Enugu and Kano.
The thing be say na for Ikom, Cross River State the refugee dey first gather when dem run comot from Cameroon, before the volunteers go move dem to other towns for Nigeria.
United Nations Refugee Agency (UNHCR) say as at 20 December 2017 e don pass 7000 people wey dem record for dia book as Cameroon refugee wey run comot dia country enter Nigeria since October 2017. How UN dey help Cameroon refugee for Nigeria.
Most of all the refugees no dey for any camp, na for people house dem na im dem dey stay.
The volunteer dey help coordinate food and medicine from UNHCR and some local government for Nigerian state where dem dey, together with Nigeria High Commission for Refugees.
According to UNHCR, the main challenge wey dem dey face na accommodation and say some communities no dey friendly with the refugee.
In fact UN workers don vow say dem no go near one camp for one Amana community again, because of how villagers attack the refugee camp come thief 1000 bags of rice.
Even with the challenge, some of those wey don enter Nigeria dey look for jobs to continue their life, some dey go back to school while others dey pick up new profession.