Liberia Supreme Court don trowey the request wey the governing Unity Party bring come to stop the 26 December presidential second round election between former footballer George Weah and Vice-President Joseph Boakai.
The party been ask for delay, because the electoral commission never carry out wetin the court order to smooth any rough matter wey dey for voters registration wey be sey people names dey appear more than once.
The court rule sey the commission no break the law to set date for the second round, and mek the commission abide by the ruling wey be sey dem must solve the wahala before Tuesday vote.
One judge no gree. Im sey the Unity Party petition for stand, because dem never arrange the voters roll wahala make e good again.
Dem call this second round election after Mr Weah beat Mr Boakai for the first round for October, but no win the majority.
The candidate wey carry third, Charles Brumskine sey the poll get k-leg but im fail for court to order new election wey all the candidates for contest.