We dey give una any thing wey dey happen for this world for Pidgin English

ICC: Nigeria judge Chile Eboe-Osuji na im be the new president

One Nigerian judge don win election as the new president for di International Criminal Court war crimes tribunal.

Chile Eboe-Osuji, wey be di first Nigerian wey go become judge since 2012 for the ICC, go begin work as ICC president for the next three years.

Na for social media and the ICC website for Sunday dem make this announcement.

Chile Eboe-Osuji talk say, ''E sweet my belle no be small as my fellow colleagues don choose me as President of the International Criminal Court''.

Eboe-Osuji still talk say im dey ready to work with the international community wey go make the ICC strong.

The ICC president and im two vice-presidents dey give the ICC focus and direction.

Charles Taylor

Which kain power ICC get?

For United Nations General Assembly conference for Rome for June 1998, 123 countries make international criminal court happen.

The work of the court na to prosecute the people wey don commit serious crime dem like genocide, war crime and any kind crime against humanity.

But the idea no be for ICC to overtake the work of national court o.

In fact, dem go only fit chook mouth for mata wey countries no fit to, or no get interest to investigate.

Among the case e don do na the one of former Liberia president Charles Taylor, wey dem jail am for 50 years, for crimes against humanity in Sierra Leone.

Burundi President Pierre Nkurunziza de pose for front form im office

Some African countries no like ICC

The Gambia, South Africa and Burundi don waka comot from the ICC and the African Union (AU) sef don chook mouth inside this ICC mata.

For 2016, the AU push make all theor member countries no join hand inside the ICC because the AU feel say e dey target Africans pass.

ICC dey find Sudan President Omar al-Bashir unto war crime for Darfur.

South Africa talk say, di ICC dey wan overtake their national court and na the reason why e comot.

But the ICC answer back say no be true, na the work of justice for people wey don suffer war crimes for Africa dem dey try do.

Na 34 African countries sign the Rome Statute wey begin the ICC.

Posted: Pidgin News

Subscribe for Newsletter