We dey give una any thing wey dey happen for this world for Pidgin English

FESTAC link bridge fit collapse - Government Nigeria

"Journey wey suppose take ordinary five minutes don turn to long thing."

This na wetin one motorist tell BBC Pidgin as im tanda for inside go-slow for Amuwo-Odofin area of Lagos State, Nigeria.

Car and bus wey burn for di fire

Na im the State government decide sey, because of the serious fire wey happen last week wey one fuel tanker fall comot for bridge and catch fire, e burn the bridge, e the bridge no too dey safe for people again.

E pass 20 cars wey burn and other properties for the fire wey the tanker cause.

Di fuel tanker wey burn

Lagos State Traffic Management Authority (LASTMA) sey dem close the bridge to save lives and property of drivers and people for the area as the fire really damage the bridge sotey, e no dey safe again for motor to drive on top am.

General Manager of LASTMA, Mr Olawale Musa, come beg sey mek people dey patient as dem wan repair the bridge and dem go try finish the work quick quick.

Mr Musa talk sey na expert tell dem sey the bridge don weak and dem no think sey, as dem close the bridge so, e go cause go-slow or affect anything.

But ordinary people wey dey use the road sey plenty traffic jam don land for the road because of sey dem close the bridge.

Plenty people hook for go-slow as di road don become 'one-way'.

BBC Pidgin tori people sef carry their own leg waka go use their own eyes see wetin dey happen. And wetin dem see be sey plenty cars dey for inside go-slow.

Mr Musa say dem don send plenty LASTMA people go di area to help control traffic so dat people no go suffer too much.

Posted: News

Subscribe for Newsletter