We dey give una any thing wey dey happen for this world for Pidgin English

Chibok/Dapchi girls: Why we no dey rush – Buhari

Nigeria President Muhammadu Buhari don talk say im want make the school girls wey Boko Haram kidnap from Dapchi and Chibok come back house alive.

Buhari say this na why im dey take im time to take any hurry-hurry action about di mata.

The presido talk this one as im dey welcome the US Secretary of State Rex Tillerson for Abuja, Nigeria.

Buhari tell di US thank you as dem dey help Nigeria fight terrorism. Im say Nigeria army dey strong but dem still need help for training and beta machine.

Mr Tillerson confam say US dey support Nigeria with equipment, training and information to take find the Dapchi Girls.

Mr Tillerson bin talk this one for conference wey im and Nigeria Minister of Foreign Affairs Geoffrey Onyeama, bin do with journalists on Monday 12 March.

"We respect say na Nigeria government get di responsibility... but the way we support Nigeria na to give dem equipment, training, people for special operations, and sharing some kain information so as to ensure say dem get all the information for planning to take bring back the [dapchi girls], talk Mr Tillerson wey go return back to Washington today.

The plan before na for Tillerson to stay for Abuja till tomorrow but tori later come out today say im need to return back to US because of "urgent mata" wey dey wait am.

Im also remind pipo say no be only Nigeria di Boko Haram wahala dey worry.

Mr Tillerson say "E also dey important to put am for context say Boko Haram na threat to others for the region."

Later this week, Buhari go visit Yobe state wey Boko Haram enter one secondary school for Government Girls Science and Technical College, Dapchi, kidnap 110 Dapchi girls.

Posted: Pidgin News

Subscribe for Newsletter