The UN refugee agency UNCHR, talk about the condition of more than forty thousand refugees wey don run comot from the Anglophone areas of southern Cameroon enter Nigeria.
Antonio Jose Canhandula, the UNHCR representative to Nigeria be follow BBC Akwasi Sarpong talk say dem no expect say the number of Cameroonians wey enter Nigeria, go high like that.
During the past year, many southern Cameroon people don migrate to avoid palava from the military wey dey clash with separatist wey dey fight to create republic wey dem call Ambazonia.
- 'Anglophone separatist no go use Nigeria scatter Cameroon'
Many of the refugees wey enter stay for areas around southern Nigeria, for Cross River state.
"E dey take time and logistics to reach the places where the Cameroonian refugees dey, because na the border towns the refugees dey first run go, we go need to bring dem enter Nigeria well well.
"We begin dey receive the refugees and asylum seekers around October of last year and e don take us time to study dem so dat we fit assist dem," talk Canhandula.
UNHCR say the reason why some of the Cameroon refugees no quick see assistance na because dem be dey expect say na one direction the refugees go follow enter Nigeria, but dem find out later say na from different different directions.
The southern Cameroon separatists dey accuse the French speaking majority for the country say na dem be the reason why opportunity for education, job and political participation no dey for those wey dey speak English.