We dey give una any thing wey dey happen for this world for Pidgin English

'Anglophone separatist no go use Nigeria scatter Cameroon'

As tension di rise on top Anglophone palava for Cameroon, Nigerian government don say im go "support the unity and territorial integrity of the Republic of Cameroon."

The National Security Adviser to President Buhari, wey be Babagana Mohammed Monguno na im talk dis one for di 6th session of the Cameroon-Nigeria Trans-border Security Committee for Abuja.

E say Nigeria don put strategy to make sure say those Anglophone separatist wey dey look for independence no go use the country take scatter Cameroon.

"Nigeria wan assure Cameroon say we go join hand on top intelligence and security to fight any kind threat wey dey our two borders," na wetin im talk.

Some leaders for the Anglophone movement be say Cameroon President, Paul Biya no dey do their region well.

Na so dem begin find their own independence; some of dem be come Nigeria but the government don deport dem go back Cameroon.

But United Nations don criticise Nigeria ontop this action well well.

di meeting na for Abuja


Try to solve the fight-fight

Mr Monguno still encourage Cameroon president Paul Biya say make im talk with all the people wey the vex for the Anglophone region and stop the wahala.

E come say Cameroon government must also find way return all the refugee wey don run enter Nigeria.

When BBC reporter Dooshima Abu ask the security adviser why dem deport the Anglophone separatist leader, Sisiku Ayuk Tabe and odas from Nigeria, e say na the foreign affairs ministry suppose answer that one and even the foreign minister of state, Khadija Ibrahim sef refuse to answer BBC questions.

But Cameroon minister for Territorial Administration and Decentralisation wey be Rene Emmanuel Sadi say the separatist leaders wey dem deport from NIgeria dey alive, and dem go soon go court.

E add say why the soldier people dey shoot for Bamenda na because the people there dey do bad thing and kill their fellow brothers.

Posted: World

Subscribe for Newsletter