Nigerian Air Force (NAF) don deny Amnesty International report say dem commit human right abuse for Numan, Adamawa State north east Nigeria.
Amnesty International release report on Tuesday wey say, 35 people die after Nigerian Air Force launch air attack for some villages.
Dem add say, as the whole attack take happen, dem no dey sure how many people die from direct attack and how many herdsmen dem kill.
NAF talk-talk person, Air Vice Marshal Olatokunbo Adesanya say the Amnesty International report dey "unfair, one-sided" and dem wan use am "embarrass" NAF.
Adesanya explain say, on 4 December 2017 the GOC 3 Division be call NAF to helep support troops wey dey try maintain peace for herdsmen/farmer crises for Numan, Adamawa State.
Im say dem see plenty people wey wear black carry guns dey burn houses for villages.
Their plane fly low many times to try pursue the people, but instead dem begin fire dem gun.
So therefore, im say, dem sef begin to shoot front of the crowd and everybody scatter.
Nigerian Army no know who the attackers be, whether na herdsmen or farmers. Dem just call dem "hoodlums."