Female genital mutilation, FGM, aka female circumcision na di practice wey dey comot the outside part of woman private part, her clitoris, for reason wey no get anything to do with medical matter.
United Nations Children's Fund, UNICEF, say e reach 200 million girls and women around the world today wey don suffer FGM, wey be bad thing against dia human rights.
The UN don declare 6 February every year to mark the International day wey dem no go gree for female genital mutilation again.
Dem say FGM dey go against girls and women right to health and their right to life because e fit cause death.
Dr. Laide Omotosho talk say e no get any medical reason wey dey to cut the woman body, say na just to suffer her.
She say plenty problem fit comot because of the female circumcision so make people stop am.
Omotosho say chronic pain, infection, HIV transmission, depression, problem to get belle and born pikin na some of the wahala wey FGM fit cause woman.
The UN Secretary General Youth Envoy, Jayathma Wickramanayake join mouth say make all countries address any hole for their law to overcome this practice. She say, ' e no dey acceptable for this 21st century'.
With the support of UNFPA and other UN agencies, many countries don pass law wey ban FGM and for 2015, Nigeria and The Gambia pass di law.
Florence Itamunoala na lawyer wey don do plenty waka for villages wia people still dey circumcise girls. She talk say even as government don ban am, im never see anybodi wey dem don carry go court on top the matter, even as plenty people still dey do am.
She say na because nobodi dey comot to report say dem do circumcision for am because the culture wey dem dey still dey hold dem well well.
But she dey encourage women not to allow this practice to continue.